శ్రీ శాస్తా (అయ్యప్ప) పంచరత్నం - Sri Ayyappa Pancharatnam

లోకవీరం మహాపూజ్యం సర్వరక్షాకరం విభుమ్ |

పార్వతీ హృదయానందం శాస్తారం ప్రణమామ్యహమ్ || ౧ ||

విప్రపూజ్యం విశ్వవంద్యం విష్ణుశంభోః ప్రియం సుతమ్ |

క్షిప్రప్రసాదనిరతం శాస్తారం ప్రణమామ్యహమ్ || ౨ ||

మత్తమాతంగగమనం కారుణ్యామృతపూరితమ్ |

సర్వవిఘ్నహరం దేవం శాస్తారం ప్రణమామ్యహమ్ || ౩ ||

అస్మత్కులేశ్వరం దేవమస్మచ్ఛత్రువినాశనమ్ |

అస్మదిష్టప్రదాతారం శాస్తారం ప్రణమామ్యహమ్ || ౪ ||

పాండ్యేశవంశతిలకం కేరళే కేళివిగ్రహమ్ |

ఆర్తత్రాణపరం దేవం శాస్తారం ప్రణమామ్యహమ్ || ౫ ||

పంచరత్నాఖ్యమేతద్యో నిత్యం శుద్ధః పఠేన్నరః |

తస్య ప్రసన్నో భగవాన్ శాస్తా వసతి మానసే || ౬ ||

ఇతి శ్రీ శాస్తా పంచరత్నమ్ |

——

అథ శాస్తా నమస్కార శ్లోకాః |

త్రయంబకపురాధీశం గణాధిపసమన్వితమ్ |

గజారూఢమహం వందే శాస్తారం ప్రణమామ్యహమ్ || ౧ ||

శివవీర్యసముద్భూతం శ్రీనివాసతనూద్భవమ్ |

శిఖివాహానుజం వందే శాస్తారం ప్రణమామ్యహమ్ || ౨ ||

యస్య ధన్వంతరిర్మాతా పితా దేవో మహేశ్వరః |

తం శాస్తారమహం వందే మహారోగనివారణమ్ || ౩ ||

భూతనాథ సదానంద సర్వభూతదయాపర |

రక్ష రక్ష మహాబాహో శాస్త్రే తుభ్యం నమో నమః || ౪ ||